Bilduma honetako liburuak euskaraz sortutakoakdira eta gero beste bilduma paralelo batean gaztelaniaz ere argitaratzen dira. Albumak dira eta marrazkiak koloretan dira orrialde guztietan. Adin tartea: 4-8 urte bitartekoa.
Aldi hartan ez zen giro munduaren gainean, ortzia hasten den goi alde haietan. Eremu zabalak, inon zabalik bada, baina halere ezin kabitu. Hodeien arteko borroka gero eta sutsuagoa zen; elkarren arteko ezin eramana, gero eta handiagoa. Euritarrak alde batetik, eta Eguzkitarrak bestetik.

Tristan pailazoa da. Gortinaren atzetik atera orduko, umeei barrea eragiten die. Eguberrietako saio hartan, ordea, Tristanek istorio bat kontatu zien umeei: istorio hartan bere bizitza kontatzen ari zen. Eta Tristan triste jarri zen.

Osaba Pirulok zaldia eta astoa ditu. Zaldiaren izena Kaxinto da, eta astoarena, Petra. Kaxinto zaldi ederra da eta osabak bere gainean trostan ibiltzen ditu ilobak. Petra, berriz, makilaz jotzen du; gutxietsi eta mespretxatu egiten du zaldi gorriaren ondoan. Eta umeek lastima handia sentitzen dute.

Gaur egun gurasoak dira etxeko zama daramatenak. Gurasoak, etxeko lanak egiten dituztenak. Gurasoak, etxeko martxaz eta seme-alabez arduratzen direnak. Gurasoak, agintzen dutenak. Gurasoak...
Baina ez pentsa hori beti horrela izan denik. Ez horixe! Lehen ez zen horrela, eta Marik eta Martxelek dute aldaketaren errua.

Misterio hark harrituta utzi ninduen. Eta aitonaren jarrera hark, sekulako jakinmina piztu zidan. Bertso hura goitik behera eta behetik gora aztertu nuen mila eta bi aldiz. Ortzadarraren azpitik jauzi egin eta norabaitera joaten zela nahikoa garbi zegoen. Baina, nora demonio joaten ote zen bada ortzadarraren azpitik salto egindakoan?

Goizeko izotz xuriaren beldur da mendi ttonttor hozbera Baina gau eskuzabal langileak ilargi xuriaren argitan laster ehotu dio laino xurizko bufanda xuria Mendi ttonttorari ezin zaio mindu eztarria bestela nork egingo dio negu xuriari ongi etorria Esnatu da mendi ttonttorra esnatu da eztarriko minik gabe bufanda xuriaren jabe Bufanda xuria xuri-xuria. Nik ere eman nahi diot negu xuriari ongi etorria nik ere nahi dut bufanda xuria Laster ehotuko didazu irribarrezko artile xuriz bufanda xuria zure besoak nirekin lotzen dituen lokarri xuria Bufanda xuria xuri-xuria.

Mieltxo mutiko bizkor eta kirolzalea urteek aurrera egin ahala moteltzen hasi zen, eta batez ere handitzen, izugarri handitzen eta handitzen. Hamar urterekin metroa eta laurogei neurtzeraino. Orain ba al dakizue zenbat neurtzen duen?Bi metro eta berrogei zentimetro. Ikaragarria egin da. Nola konponduko ote da lo egiteko? Eta eskolan? Lagunek barre egingo ote diote?
Antton Kazabon Oiartzun, 1954. Txikitan Gurutze auzoko eskolan ibili zen eta, eskola munduak erakarrita, magisteritza ikasketak egin zituen. Ondoren herriko Haurtzaro ikastolan lanean hasi eta 1991 arte aritu zen bertan. 1994 arteko hiru urte horiek Gipuzkoako Ikastolen Elkartean egin zuen lan Bertsolaritza ikastetxeetan izeneko proiektuan, ikasmateriala sortzen, irakasleak prestatzen eta bertso eskolak koordinatzen. 1994an ikastolara itzuli, eta gaur arte.Ikasleei irakurtzeko zaletasuna pizteko ahaleginetan, irudiz jositako kontakizun laburrak argitaratzen hasi zen orain dela ia 20 urte. Geroztik genero gehienak landu ditu oiartzuarrak. Narrazioa, poemak, bertsoak... Guztira 60 liburu kaleratu ditu orain arte, gehienak haur eta gazte literaturakoak direlarik.

INFANTILES.

COLECCIÓN IPOTXAK ETA ERRALDOIAK-HAUR ETA GAZTE LITERATURA